Miss Mizoram than boruak a 'hot' tan
Admin
4
Miss thlan a nih tawh chuan tu mai pawhin an ngaihven emaw tih mai tur a ni a, a boruak a 'hot' lo thei lo. Miss Mizoram 2024 thlanna pawhin boruak a nei lian chho zel a, social media lamah pawh titi a luah hneh hle.
March 25, 2024 khan open audition neih niin, result pawh puan a ni tawh. Aizawl-a open audition neihah hian mi pariat (8) ten audition an paltlang a, District Miss mi 10 te nen mi 18 ten intihsiak an hmachhawn zui dawn a ni. District hrang hrang ten an mahni District aiawh tur an thlang chhuak a, District zawng zawng erawh an tel kim thei dawn lo thung.
Miss Mizoram 2024 thlanna hi Mizoram Journalist Association (MJA) leh Zonet tangkawp ten an buatsaih a ni a, District Miss thlanna hi MJA ten an bultum. Aizawl-a intihsiak sang zawk an hmachhawn zui tur erawh Zonet kutah a awm ang. Judge zingah MJA member pahnih an tel dawn tho a, midang pahnihte nen a endik hna hi an thawk zui dawn a ni.
Intihsiak hi April atangin tan a ni dawn a, a boruak pawh a lian chho leh viau dawn a ni. Miss Mizoram thlanna hi Zonet leh MJA tangkawp hian tum thum an lo buatsaih tawh a, Miss Mizoram atan hian Aizawl pawn lam mi vek than an la ni! Rody H. Vanlalhriatpuii (Lawngtlai), T. Ramthanmawii (North Khawbung) leh Zirsangpuii (Khawzawl) te chuan lal lukhum an lo khum tawh a, a hma pawhin Miss Mizoram hi eng emaw zat thlan an lo ni tawh bawk.